టెక్నాలజీ దిశగా అనిల్ అంబానీ కంపెనీ.. ఏఐ రంగంలోకి అడుగు

పారిశ్రామికవేత్త అనిల్ అంబానీకి చెందిన రిలయన్స్ ఇన్ఫ్రాస్ట్రక్చర్ (ఆర్-ఇన్ఫ్రా) ఒక కీలకమైన నిర్ణయం తీసుకుంది. ఆర్టిఫిషియల్ ఇంటెలిజెన్స్ (ఏఐ), ఇతర నూతన టెక్నాలజీల రంగంలోకి ప్రవేశిస్తున్నట్లు నేడు అధికారికంగా ప్రకటించింది. తన వ్యాపార కార్యకలాపాల్లో టెక్నాలజీ ఆధారిత సేవలను భాగం చేసే వ్యూహంలో భాగంగా ఈ అడుగు వేస్తున్నట్లు కంపెనీ తెలిపింది.

ఈ మేరకు తమ అనుబంధ సంస్థల (సబ్సిడరీలు) ద్వారా ఈ కొత్త వ్యాపారంలోకి ప్రవేశిస్తున్నట్లు స్టాక్ ఎక్స్ఛేంజీలకు సమర్పించిన ఫైలింగ్‌లో రిలయన్స్ ఇన్ఫ్రా పేర్కొంది. వేగంగా అభివృద్ధి చెందుతున్న ఏఐ, సంబంధిత టెక్నాలజీ విభాగాల్లో పాలుపంచుకోవడమే లక్ష్యంగా ఈ నిర్ణయం తీసుకున్నట్లు వివరించింది. ఈ ప్రణాళికలో భాగంగా తమ మూడు సబ్సిడరీల పేర్లను కూడా మార్చింది. వాటికి రిలయన్స్ ఏఐ వరల్డ్ ప్రైవేట్ లిమిటెడ్, రిలయన్స్ ఏఐ అపెక్స్ ప్రైవేట్ లిమిటెడ్, రిలయన్స్ ఏఐ వన్ ప్రైవేట్ లిమిటెడ్ అని కొత్త పేర్లు పెట్టింది.

రిలయన్స్ ఇన్ఫ్రా ఏఐ రంగ ప్రవేశ ప్రకటన మార్కెట్లో తక్షణమే సానుకూల ప్రభావం చూపింది. ఈ వార్త వెలువడిన వెంటనే బీఎస్ఈలో కంపెనీ షేరు 5 శాతం పెరిగి రూ.86.17 వద్ద అప్పర్ సర్క్యూట్‌ను తాకింది. అయితే, గత కొంతకాలంగా ఈ షేరు పనితీరు మిశ్రమంగా ఉంది. గత ఏడాది కాలంలో సుమారు 80 శాతం నష్టపోయినప్పటికీ, గత నెల రోజుల్లో 20 శాతానికి పైగా లాభపడటం గమనార్హం. గత ఆరు నెలల్లో 40 శాతం పతనం కాగా, గత ఐదేళ్లలో మాత్రం 3 శాతానికి పైగా లాభాలను అందించింది.

ఇక కంపెనీ ఆర్థిక ఫలితాలను పరిశీలిస్తే, 2026 మార్చితో ముగిసిన త్రైమాసికంలో రూ. 918 కోట్ల నికర లాభాన్ని ప్రకటించింది. కార్యకలాపాల ద్వారా రూ. 4,001 కోట్ల ఆదాయం వచ్చినట్లు తెలిపింది. అలాగే, 2025-26 పూర్తి ఆర్థిక సంవత్సరానికి గాను కంపెనీ రూ. 2,900 కోట్ల లాభాన్ని, రూ. 20,440 కోట్ల ఆదాయాన్ని నమోదు చేసింది.

అయితే, ఏఐ రంగంలోకి ప్రవేశిస్తున్నట్లు ప్రకటించినప్పటికీ, ఈ ప్రాజెక్టులకు ఎంత పెట్టుబడి పెట్టనున్నారు, నిర్దిష్ఠ‌ వ్యాపార ప్రణాళికలు ఏమిటి, ఎప్పటిలోగా కార్యకలాపాలు ప్రారంభిస్తారు? వంటి కీలక వివరాలను కంపెనీ ప్రస్తుతానికి వెల్లడించలేదు. ఈ అంశాలపై భవిష్యత్తులో స్పష్టత వచ్చే అవకాశం ఉందని మార్కెట్ వర్గాలు భావిస్తున్నాయి.